სიახლეები
ბოლო 24 საათი სირიაში, 12 თებერვალი
2020 / 02 / 12
ზურაბ ბატიაშვილი, რონდელის ფონდის მკვლევარი
- გაიმართა სატელეფონო საუბარი რუსეთისა და თურქეთის პრეზიდენტებს შორის. მხარეებმა რაიმე სახის კონკრეტულ შეთანხმებას ვერ მიაღწიეს;
- ანკარაში სასწრაფო წესით ჩაფრინდა აშშ-ს სპეციალური წარმომადგენელი სირიის საქმეებში ჯეიმს ჯეფრი. მან კიდევ ერთხელ გამოხატა აშშ-ს მხარდაჭერა თურქეთის მიმართ სირიაში წარმოებულ სამხედრო ოპერაციასთან დაკავშირებით;
- თურქეთის პრეზიდენტმა ერდოღანმა განაცხადა, რომ თურქ სამხედროებზე შეტევის მიტანის შემთხვევაში მკაცრი სამხედრო პასუხი გაეცემა ასადის რეჟიმის ძალებს. მისივე შეფასებით, მოწინააღმდეგის ავიაცია თავისუფლად ვეღარ იფრენს იდლიბის თავზე;
- ასადის რეჟიმის განცხადებით, თურქი სამხედროების ყოფნა სირიის ტერიტორიაზე უკანონოა და არღვევს საერთაშორისო სამართლის ნორმებს;
- იდლიბის პროვინციაში შესულმა თურქულმა სამხედრო ნაწილებმა რამდენიმე ადგილას ახალი ბლოკ-პოსტები დააარსეს;
- რუსული სამხედრო ავიაცია აგრძელებდა იდლიბის პროვინციაში გამაგრებული ოპოზიციის ძალების დაბომბვებს;
- ასადის რეჟიმის ძალები განაგრძობდნენ წინსვლას. მათ ქ. ალეპოსა და ქ. იდლიბს შორის რამდენიმე დასახლებული პუნქტი დაიკავეს;
- ჩრდილოეთ სირიის აღმოსავლეთ ნაწილში მოხდა შეიარაღებული კონფლიქტი ამერიკელ და სირიელ სამხედროებს შორის. ინციდენტის შედეგად დაიღუპა 1 და დაიჭრა 1 სირიელი სამხედრო მოსამსახურე, რომლებიც ამერიკული სამხედრო მანქანიდან აშშ-ს დროშის ჩამოხსნას ცდილობდნენ.